Ginpahayag sang gobernador sang probinsya sang Negros Occidental nga malupok gid ang bulkan Kanlaon apang wala lang nahibaluan kun san-o.
Kahapon pasado alas- 5:00 sang kaagahon nagbuga sang abo ang bulkan kag ini ang nasundan matapos ang pila lang ka oras.
Una nga naglupok ang bulkan sang Hunyo 2024 kag liwat nga nag-erupt sang Disyembre 9, 2024 kun sa diin ginpalapad sa 6km ang permanent danger zone.
Tubtob sa karun nagapabilin nga yara sa evacuation areas ang mga residente nga apektado sang paglupok sang bulkan.
Suno kay governor Eugenio Jose ‘Bong’ Lacson, nagmeeting ini kaupod ang volcanologist experts sang Philippine Institute of Volcanology and Seismology (PHIVOLCS) kag naghambal ang mga ini nga malupok gid ang bulkan.
Suno diri, may pagsinapol pa nga patigayunon sa masunod nga semana kaupod ang Office of Civil Defense, task force Kanlaon, kag iban pa nga ahensya sang gobyerno.
Pahayag ni Lacson, ang P50 million nga pondo nga naggikan sa national government nga ginhatag para ibulig sa mga evacuees ang yara sa gihapon sa provincial government bangod ang ginagamit sa karun ang pondo pa sang probinsya.
Apang, aminado ang gobernador nga sa tion nga maglupok ang bulkan kulangon gid ang P50 million nga pondo.
Sa karun, suno sa gobernador, milagro na lang gid ang kinahanglan agud nga magkalma ang bulkan.
