Nagalaom ang gobernador sang Negros Occidental nga sa labing madali nga panahon madakpan na ang nabilin nga mga suspek sa pagpatay kay Governor Roel Degamo sang Negros Oriental.
Nahibaluan sang tinalikdan nga adlaw, ginatos ka mga tropa nagikan sa Armed Forces of the Philippines kag Philippine National Police ang gindeploy sa nagkalain-lain nga bahin sang Negros Oriental agud magpatigayon sang security checkpoints.
Gin-activate man ang Joint Task Force nga magatutok sa karun agud nga mapunggan ang kalakasan sa isla sang Negros kasunod sang pagpatay kay Degamo.
Kalakip sa gindeploy ang composite soldiers gikan sa anum ka Army battalions nga magapanguna sa 21 ka joint AFP-PNP checkpoints sang Domingo sa 3rd District sang Negros Oriental.
Suno kay Lacson, ang kaangay nga sitwasyon ang indi maayo sa turismo kag mahimo nga indi ini mahangpan sang mga foreign tourists indi kaangay sang mga tawo mismo sa probinsya kasubong man ang mga Pilipino nga nagikan sa lain nga lugar kag nagbisita sa probinsya.
Suno sa gobernador, mas maayo nga madakpan gilayon ang mga ginalagas nga suspek agud nga indi man maapektuhan ang turismo sa probinsya kasubong man ang ila nga ekonomiya.
Bukas man ang Negros Occidental sa mga turista nga magpadulong diri nagikan sa Negros Oriental ingkaso nga magtabok ini nagikan didto.
