Para sa gobernador sang Negros Occidental, nagpahapos lang ang advertising agency nga nagprepapar kag nagpublish sang “Love the Philippines” tourism promotion video sang Department of Tourism.
Sa interview sang Bombo Radyo kay Governor Eugenio Jose “Bong” Lacson, dako ang budget nga P49 million apang nagpahapos lang ang ahensya sa paghuman sang promotion video.
Dugang pa nga ang ginbutang nga logo ang “Love the Philippines” apang may yara sang portion sa video nga indi man sa Pilipinas makit-an.
Gin-ako man mismo sang DDB Philippines, ang ahensya nga nagpublish sang video kag sila man ang nangayo sang pasaylo.
Apang, suno kay Lacson, disappointing ang natabo ilabi na nga ang slogan nagapromote sang turismo sang Pilipinas kag lain nga nasyon ang ginapakita.
Nakabaton naman sang kritisismo ang bag-o nga logo nga “Love the Philippines” kun sa diin mas naluyagan sang kadam-an ang nakaligad nga “Its More Fun in the Philippines” logo, apang suno kay Lacson normal lamang nga makabaton sang kritisismo kun may ipakilala nga bag-o, apang sa bahin sini ang bag-o nga logo ang may yara gid man sang kapaltahan sa pagclaim nga Love the Philippines apang lain man nga pungsod ang ginapakita.
Samtang, ginalauman naman sang gobernador sang probinsya nga malakip ang mga bugal nga tourist site sang Negros Occidental kun sa diin nakagenerate sang kapin P5 billion ang tourism industry sang probinsya sang tuig 2022.
