Napadala na sang gobernador sang probinsya sang Negros Occidental ang sulat sa national Inter-Agency Task Force (IATF) agud hingyuon nga ipabilin sa General Community Quarantine (GCQ) ang probinsya tubtob sa katapusan sang bulan.
Ini matapos nga gintumod nga isa sa mga low risk areas ang Region 6 kag indi na kinahanglan nga magpaidalom sa community quarantine sumugod Mayo 16.
Sa sulat nga ginpadala ni Governor Eugenio Jose “Bong” Lacson, ginalauman nga matapos ang konstruksyon kag accreditation sang COVID-19 testing bio-lab sa Teresita Jalandoni Provincial Hospital sa sulod sang duha ka semana nga pagpalawig sang GCQ.
Suno sa gobernador, indi sini luyag nga mabutang sa risgo ang kabuhi sang mga pumuluyo tubtob mahuman ang bio laboratory para sa COVID-19.
Aminado man ini nga sa tion nga magbukas ang mga airports kag sea ports, magadamo na ang mga tawo kag indi na ini makontrolar pa kag dako ang risgo nga magdamo pa ang kaso sang COVID-19 sa probinsya kaangay lamang sang ginpapauli nga mga seafarers kag OFW nga nagpositibo sa balatian.
Nagalaom si Lacson nga aprubahan ini ni Presidente Rodrigo Duterte agud nga mapabilin sa gihapon ang safety measures nga ginapatuman sang probinsya tubtob nga mangin fully operational ang diagnostic testing facility sang Negros Occidental nga magapatigayon sang mass testing sa mga incoming passengers nagikan sa mga high risk areas.
