Gin-assassinate ang gobernador sang Negros Oriental sa ila mismo nga balay sa Sitio Nuebe, Barangay San Isidro, Pamplona, Negros Oriental kaina sang aga.
Suno sa Negros Oriental Police Provincial Office, nagapamulong-mulong si Governor Roel Degamo sa mga benepisyaryo sang Pantawid Pamilyang Pilipino Pilipino program kaupod ang pila ka department heads sa Kapitolyo sang nagsulod ang anom ka mga suspetsado nga nagpakilala nga miyembro sang Philippine Army, nagasuksok sang bullet proof vest kag armado sang long firearms.
Gintiro sang mga ini ang guard sa compound sang gobernador antes gintiro ang mga tawo nga nagapungko kag nagaatubang kay Degamo kag gintiro man ang gobernador.
Ginfinishing pa sang isa ka suspetsado si Degamo antes nagpalagyo sakay sa duha ka getaway vehicle.
Suno kay Mayor Galic Truita sang Dauin, Negros Oriental nga kaupod ni Degamo sa ila nga political party, ginpahayag sang doktor nga nagsulod ang bala sa natuo nga bahin sang lawas sang gobernador kag naggwa sa nawala nga bahin gani naigo ang kasing-kasing sini.
Suno diri, si Degamo ang target sang mga suspetsado bangud ginfinishing pa ini sang siya ang natumba na.
Magluwas kay Degamo, lima ka iban pa ang naigo sang bala.
Gindala ang mga ini sa Silliman University Medical Center sa Dumaguete City apang ginbawian sang kabuhi.
Suno sa alkalde, ginacater sang opisyal ang mga pumuluyo nga may reklamo gani gin-extend sini ang serbisyo sa ila nga compound sa Pamplona gani yara ang mga department heads kaina sang aga.
Nagpanawagan ini sang pangamuyo nga indi na ini matabo liwat kag para man sa kalag sang gobernador.
Gintugyan naman sini sa mga kapulisan ang pag-imbestigar sa krimen.
