Isa na ka tuig nga kasado ang dancesport partners nga nakakuha sang gold kag silver medals sa Dance Sport competition sa 30th Southeast Asian Games.
Sa pagpanalawsaw sang Bombo Radyo news team, nahibaluan nga isa ka Bacoleño si Michael Angelo Marquez nga tumandok sang Purok Cabugwason, Barangay Mansilingan.
Samtang, taga-Baguio City naman ang asawa sini nga si Stephanie Sabalo.
Si Marquez ang naga-intra na sa mga Latin Dance competitions halin grade school tubtob ini nagkolehiyo.
Si Sabalo naman ang may yara man sang background sa hiphop sang ini ang magsugod sa dancesports kag bangud nanamian ini nga magsuksok sang gown, na-engganyo siya sa Standard Dance apang mas ginpili sini ang Latin bangud suno sa iya, mas upbeat ini.
Sa programa nga Kahapon Lamang, ginsaysay ni Marquez kun paano nagsugod ang partnership nila ni Sabalo sa pagsaot nga nahulog sa pagpakasal sa ulihi.
Tuig 2007 sang una sila nagkilalahay bangud sa ‘common friend’.
2008, nagsugod sila nga mangin partner sa saot apang wala nangin maayo ang sugod sang ila partnership bangud permi sila pierdi.
Nagdesisyon ang mga ini nga magpadulong sa Myanmar.
Didto kag nagsugod na sila daog sa mga kompetisyon.
Makaligad ang duha ka tuig, nagpauli ang mga ini sa Pilipinas.
Apang, antes magbalik sa pungsod nag-confess si Marquez sang iya nabatyagan kay Sabalo.
Suno diri, nabudlayan siya sa pagpangaluyag sa una apang nangin worth it naman ang tanan.
Opisyal nga nangin mag-nobyohanay ang duha sang 2012 kag nagpakasal sang Agosto 28 sang nagligad nga tuig.
Madumduman nga sa una nga adlaw sang SEA Games Competition, nakuha nanday Marquez kag Sabalo ang gold medal sa Open Latin kag Paso Doble category samtang silver medal naman sa Jive.
