Nagsugod na ang gintukod nga Good Governance committee sang Bacolod sa pagbaton sang mga impormasyon ukon mga dokyumento angot sa mga transaksyon nga ginsudlan sang tinalikdan nga administrasyon.
Ang committee ang ginalakipan sang City Legal Office kag City Administrator’s Office.
Suno kay City Administrator Atty. Pacifico Maghari, nagsapol sila sang tinalikdan nga Biyernes kun sa diin nag-appoint man sang secretariat nga magabaton sang anuman nga impormasyon.
Suno kay Maghari, ginareview ang mga transaksyon bangud luyag nila nga himuon ang mga ini nga proper kag orderly.
Ini ang magatalana man sang giya nga nagakaigo ang palaabuton nga mga transaksyon.
Suno sa city administrator, ang sin-o man nga luyag maghatag sang report ukon dokyumento ang sarang gid makapadulong sa City Legal Office.
Mandato sang Good Governance committee ang pag-usisa sa past transactions kag existing practices nga sarang mamodify gani pangitaon lang ang secretariat sa City Legal Office.
Suno diri, may mga abogado sa Legal Office nga amo ang magabaton nagikan sa anonymous ukon sarang man nga makapakilala ang nagsubmit.
Ginausisa man sang committee ang mga dokyumento bangud luyag nila nga makahimo sang consolidated report nga ginalakipan sang financial documents kag mga dokyumento sang tinalikdan nga administrasyon nga igaretrieve pa lang nagikan sa mga departamento.
