Nagpanugyan ang isa ka good samaritan sa mga himata sang mga katigulangan kasunod sang iya pagsapupo sa 57-anyos nga si Areta Sausa nga naglakat halin sa banwa sang Binalbagan tubtob sa Silay City, Negros Occidental sa sulod sang duha ka semana.
Sa interview sang Bombo Radyo Bacolod kay April Rose Ubaldo, residente sang Barangay 5, Silay City, ginpahayag sini nga nakita niya ang tigulang sa higad sang dalan gani ginpondohan nila ini agud pamangkuton kun sa diin ini naghalin kag diin magapadulong.
Gintuad ni Sausa nga duha na ka semana ang iya paglakat bangud naghalin ini sa balay sang iya kamanghuran nga anak bangud nahuya man ini nga magpasagod.
Kaupod sini nga naglakat ang iya ido nga si Rex kag ang karito sini nga may mga unod nga kagamitan.
Una nga gin-offeran ni Ubaldo ang tigulang nga iturn over ini sa pulis agud mabuligan pabalik sa EB Magalona apang nagpangindi ini.
Ginpapanyapunan niya man nila ini kalakip na ang ido bangud natabuan man nga nagapakaon ini sang mga layaw nga ido kag sang nakapahuway na ang tigulang ginhambalan ini liwat nga iendorso sa pulis agud mabuligan sa pagpauli apang nagapangduha-duha ini.
Gani nagdesisyon na lamang si Ubaldo kag ang manghod nga sila na lamang ang magadul-ong sa EB Magalona.
Sang nag-abot sila sa EB Magalona, natabuan man nga ang isa sa nagabantay sa checkpoint nga mga tanod ang nakakilala kay Sausa kag gilayon man nga gintawgan ang mga himata agud sugaton nga makapauli.
Kasunod sini, nagpanugyan si Ubaldo sa mga himata sang mga tigulang nga dapat bantayan sila bangud kadelikado kun magsagad sila lagaw kag tion naman nga sila ang hatagan sang nagakaigo nga atensyon kag pagpalangga.
