Wala sang nabaton nga reklamo ang gobernador sang Negros Occidental angot sa pagpanagtag sang presidential scholarship grant sa idalom sang Bawat Barangay Makikinabang (BBM) program, apang dapat pangatubangon sang Barangay Official ang reklamo nga ipasaka batok sa ila kun ini ang naglapas sa pagsulundan sa releasing.
Sa interview kay Negros Occidental Governor Eugenio Jose “Bong” Lacson, wala siya sang nabaton nga reklamo may kaangtanan sa nasambit nga scholarship grant kag ang mga Punong Barangay ang ginhatagan sang mandato nga magdesiyon kun anhon ang P200,000 nga pondo, kun sa diin ang P100,000 ang para sa Barangay projects kag ang P100,000 para sa lima ka mga scholars.
Suno kay Lacson, kun may yara sang reklamo angot sa nasambit nga programa dapat sabton ini sang mga Barangay Officials, bangud ang provincial government ang nagfacilitate sa paghatag sa Barangay apang ang mga opisyales ang nagdesisyon kun ano nga proyekto ang ipatuman kag kun sin-o ang beneficiaries sa scholarship grant gikan sa Office of the Vice President.
Madumduman nga gin-uli sang Punong Barangay sang Barangay Tabunan, Bago City ang P20,000 nga scholarship grant nga nabaton sang bata sini matapos nga gin-ulan sang negatibo nga komento bangud nangin mainit ini nga topiko sa social media.
Samtang duha man ka kabataan sang Punong Barangay sa Brgy Tomina, Cauayan ang ginpasulod sa programa.
