Ginkompirmar sang Negros Occidental Provincial Administrator nga nagsulat kahapon ang gobernador sa probinsya sang Negros Occidental sa Regional IATF agud maghingyo sang isa ka semana nga moratorium humalin sa Oktubre 1 tubtob Oktubre 7 para sa mga Locally Stranded Individuals (LSI) kag mga Returning Overseas Filipinos (ROFs) bangud napuno na ang mga quarantine facilities sang probinsya kag mga LGUs.
Sa interview sang Bombo Radyo Bacolod kay Atty. Rayfrando Diaz, ginpahayag sini nga ginpalab-ot sang katapo sang Disaster Risk Reduction Management Office (DRRMO) kag mga quarantine team sang probinsya nga napuno na ang quarantine facilities sang probinsya gani kinahanglanon sang moratorium.
Suno kay Diaz, magasige ang outbound flight apang cargo flight lamang ang tugutan nga makasulod kasubong man sa mga barko nga cargo vessels lang ang pagsugtan nga makasulod sa probinsya.
Ginpahayag man sang Provincial Administrator nga ang measures ang para sa Public safety bangud indi magrisgo ang provincial government nga maghome quarantine ang mga LSI kag ROF bangud sa kakulangan sang quarantine facilities kag ang nakita nila nga solusyon ang pagpatuman sang moratorium.
Samtang, ginpahayag man ni Diaz nga pagahimuon na nga COVID Hospital ang District Hospital sa syudad sang Cadiz kag banwa sang Valladolid.
Ang Cadiz City District Hospital ang dugangan ang bed capacity agud mangin 110 beds samtang ang sa Valladolid naman ang dugangan man agud mangin 50 beds.
