Ginpasalig sang gobernador nga padayon ang pagbulig sang Negros Occidental provincial government sa mga evacuees gikan sa 4-kilometer radius permanent danger zone sang Bulkan Kanlaon sa duha ka barangay sang banwa sang La Castellana.
Nahibaluan nga yara na lamang sa 15 ka pamilya ukon 50 ka indibidwal ang evacuees gikan sa Barangay Biak na Bato kag Barangay Masulog sa nasambit nga banwa.
Sa interview sang Bombo Radyo Bacolod kay Negros Occidental Governor Eugenio ‘Jose’ Bong Lacson, ginpasalig sini nga sila ang nagacoordinate kay La Castellana Municipal Mayor Rhummyla Nicor Mangilimutan, agud mahibaluan ang sitwasyon sang mga evacuees.
Ang mga evacuees ang yara naman sa karun sa tagsa ka barangay kag ang municipal kag provincial government naman ang padayon nga magahatag sang suporta.
Pasalig sang gobernador nga bastante pa ang mga goods ilabi na nga nagnubo naman ang numero sang evacuees.
Ginalauman ni Lacson nga magkalma na ang bulkan bangod sa karun ini ang nagabuga naman sang madamo nga sulfur dioxide.
Ini ang ginalantaw nga senyales nga mahimo pa maglupok ang Bulkan Kanlaon.
Panawagan na lamang sang gobernador nga dugangan pa ang pagpangamuyo nga wala sang matabo nga disaster.
