Nagpagwa na sang Executive Order No. 21-33 series of 2021 si Negros Occidental Governor Eugenio Jose “Bong” Lacson natuhoy sa pagpaidalum sang bug-os nga probinsya sa General Community Quarantine (GCQ) humalin sa Hulyo 1 tubtob 31, 2021.
Madumduman nga sang Lunes sang gab-i, nagpahayag sang rekomendasyon ang National Inter-Agency Task Force (NIATF) kag Presidente Rodrigo Duterte natuhoy sa Quarantine Classification sa pungsod kun sa diin nalakip ang Negros Occidental kag Bacolod City sa ginarekomendar nga ipaidalum sa GCQ.
Magasugod ang implementasyon sang EO humalin alas-12:00 sang kaagahun sa Hulyo 1, 2021 kag magatakop sa alas-11:59 sang Hulyo 31, 2021.
Magapabilin naman ang pagpatuman sang uniformed travel protocol sa probinsya santo sa nauna nga EO No. 21-18 kag sa Inter-Agency Task Force for Emerging Infectious Diseases (IATF-EID) Resolution No. 101 series of 2021.
Nagapabilin man ang full implementation sa mas ginpasanyog nga tikang batok sa mass gatherings santo sa EO No. 21-21 series of 2021.
Samtang sa pagpaidalum sa GCQ sang probinsya, pagadiraduhan naman ang pila ka mga establishimento kaangay sang Entertainment Venues nga ginalakipan sang bars, concert halls, theatre kag iban pa; Recreational Venues nga ginalakipan sang net cafes, billiards, arcades kag iban pa; Amusement Parks; Fairs; Playgrounds; Kiddie Rides kag kasubong man ang tradisyunal nga cockfighting kag cockpits.
Ang curfew hours sa probinsya ang magapabilin gihapon sa alas-9:00 sang gab-i tubtob alas-4:00 sang aga.
Samtang magapabilin man ang pagpatuman sang mandatory nga pagparehistro sa Safe, Swift and Smart Passage (SPASS) sang mga travelers padulong sa Negros Occidental.
