Aminado si Negros Occidental Governor Eugenio Jose ‘Bong’ Lacson nga madamo ang mga programa nga kinahanglan tutukan sang gobyerno agud nga mapanubo ang poverty rate, kaangay sang namensyonar ni President Ferdinand ‘Bongbong’ Marcos Jr. sa iya nga State of the Nation Address kahapon.
Sa interview sang Bombo Radyo kay Lacson, klaro ang luyag sang presidente kun sa diin ginplastar sini sa SONA ang 19 ka hagna nga luyag niya nga ipapasar sa Kongreso.
Nakuha ang atensyon ni Lacson sa plano sang presidente nga mapanubo ang poverty rate sa single digit sa tuig 2028.
Suno kay Lacson, madamo ang dapat himuon sang gobyerno agud nga mapanubo ang poverty level kaangay na gid lamang sa sektor sang agrikultura bangud madamo sang mangunguma nga nagapabilin nga pigado.
Ginalantaw sang gobernador nga mas barato ang farm inputs kun baklon sang gobyerno sang tingob apang indi pa maathag kun ibaligya ini ukon ihatag lang sa mga mangunguma.
Luyag man sang gobernador nga maathagan sa pahayag ni Marcos nga mapatuman sang isa ka tuig nga moratorium sa agrarian reform beneficiaries sa amortization kag interest payment apang ginpahayag man sini nga may condonation sang P58 billion nga balayran sang ARBs.
Ginpasalig man ni Marcos nga may farm loans sa ARBs kada tuig gani mas maayo suno sa gobernador kun may yara sang clarification angot diri.
Aminado ini nga ginahatagan sang presidente sang prayoridad ang sektor sang agrikultura gani nagdesisyon ini nga siya ang magaserbe bilang tiglikom sang Department of Agriculture.
