Bukas si Negros Occidental Governor Eugenio Jose “Bong” Lacson pananglitan nga may maga-atubang sa iya sa pagpadalagan bilang gobernador sang probinsya sa 2022 election.
Samtang sa pihak sang mga balita nga gina-endorso sang Yanson matriach nga si Olivia Yanson si Atty. John Orola, nagapati naman ang gobernador sa pagpaathag sang tagpamaba sang Vallacar Transit Inc. kun sa diin gindeny sini nga ginapangitaan sang pamilya Yanson sang kontra sa eleksyon si Lacson.
Nagkadlaw naman si Lacson sa alegasyon nga magapagwa si OVY sang P200 million bilang pondo sa pagsuporta sa makasumpong niya.
Suno pa diri, indi ini makapati nga may pamilya nga magapagwa sang amo ka dako nga balor para lang sa kaangay nga rasun.
Samtang pahayag man sini nga may kinamatarong si Atty. Orola nga magpadalagan bilang gobernador may suporta man sang Yanson Family ukon wala.
Paathag ni Lacson nga mahibaluan nalang sa Oktobre kun may-ara ini sang challenger.
Paathag sini nga ang eleksyon amo ang makabig final survey sa isa ka nagapungko nga politiko agud makita kun malipayon ang mga pumuluyo sa pagpadalagan sini sang gobyerno.
Dugang pa sini nga ang mga pumuluyo amo ang magadesisyon kun sin-o ang nagakaangay nga magpungko.
Suno kay Lacson, liwat ini nga magapadalagan bilang gobernador bangod para sa iya maayo ang iya mga binuhatan.
Ginalauman sini nga ang mga magapadalagan para sa palaabuton nga eleksyon, ang magapadalagan bangod nagapati nga makahimo sang mas maayo, kag indi bangod ginsugo lang nga magpadalagan.
Ginapaseguro naman sini nga magapabilin ang coalition sa tunga nila ni Vice Governor Jeffrey Ferrer.
