Indi magpasugot ang gobernador sang Negros Occidental nga iuli sang provincial government sa Department of Health ang COVID vaccines nga ginpadala sang ahensya sa probinsya.
Ini ang kasunod sang pahayag ni DOH Secretary Francisco Duque III nga hulamon anay sang ahensya ang COVID vaccines sa mga probinsya nga manubo ang kaso sang COVID bangud pasulabihon ang mga health workers sa Metro Manila kun sa diin nagsaka na naman ang numero sang mga natapikan sang virus.
Sa interview sang Bombo Radyo kay Governor Bong Lacson, indi pag-ibalik sang provincial government ang Sinovac kag AstraZeneca vaccines nga ginhatag sang DOH.
Suno kay Lacson, ang bakuna nga wala nagamit kag ginatago sa karon sa cold room sang Provincial Health Office ang ginatigana bilang 2nd dose sa mga gintublukan sang 1st dose agud masiguro nga makabaton sila sang kumpleto nga doses sang bakuna.
Sa diri nga paagi suno sa gobernador, mas madamo ang health workers nga makumbinsi nga magpabakuna.
Sa tion nga ibalik sa DOH ang gintigana nga 2nd dose suno kay Lacson, wala sang kasiguraduhan kun san-o magaabot ang masunod nga batch sang bakuna kag magadamo na gid ang indi willing nga magpatublok.
Suno kay Lacson, ang DOH naman mismo ang nagpahayag nga sensitibo ang bakuna kag dapat nga halungan ang pagtransport sini.
Panugyan sang gobernador sa DOH, ang ikaduha nalang nga batch sang bakuna ang ila nga ihold kag indi pagbawion ang una nga ginpadala. Samtang, nagapati si Governor Bong Lacson nga wala siya nagaisahanon sa pagpamatok sa pag-uli sa Department of Health sang COVID vaccines nga ila ginpadala sa probinsya agud itublok sa mga medical workers sa Metro Manila.
Suno kay Lacson, madamo ang mga gobernador nga indi magpasugot sa plano sang DOH bangud mismo ang presidente sang League of Provinces of the Philippines ang nagpabutyag sang pagpamalabag diri.
Aminado ang gobernador nga wala pa sila nakapatigayon sang Zoom meeting angot diri apang mahimo nga magadihon sila sang position paper angot sa plano sang DOH.
Sa karon suno kay Lacson, may pila na ka mga LGUs nga nagaproblema kun san-o maabot ang ikaduha nga shipment sang bakuna bangud gin-ubos nila gamit ang una nga shipment kag wala na sang napain para sa 2nd dose.
Una na nga ginpahayag ni LPP president Marinduque Governor Presbitero Velasco Jr. nga nagapamatok ini sa pagbalik sa DOH sang mga bakuna nga wala nagamit.
Suno kay Velasco, limitado ang supply sang bakuna nga ginpadala sa mga probinsya.
Nagpanawagan man si Velasco sa national government nga konsultahon ang natungdan nga local government officials kun mapasugot sila sa pag-recall sang COVID vaccines.
Panindugan sang presidente sang liga sang mga kaprobinsyahanan, luyag man sang tanan nga LGUs nga makabakuna sang madamo nga mga residente agud nga malab-ot ang herd immunity.
