Wala nagakompormi ang gobernador sang Negros Occidental sa plano ni incoming Department of Social Welfare and Development (DSWD) Secretary Erwin Tulfo nga ihatag bilang lump sum ukon isa ka hatagay ang conditional cash assistance sa mga beneficiaries sang Pantawid Pamilyang Pilipino Program (4Ps).
Sa karun, quarterly ang pagpanagtag sang cash assistance sa mga 4Ps beneficiaries apang ginasuhestiyon sang palaabuton nga tiglikom sang DSWD nga ini ang ihatag kada tuig agud ila maggamit pang-negosyo.
Suno kay Governor Eugenio Jose “Bong” Lacson, dako ang mabulig sang tingob nga cash assistance kun ini ang gamiton sang maayo apang kun indi, tubtob lamang ini sa isa ka semana.
Suno kay Lacson, nalakip sa kondisyon sang 4Ps nga dapat ginapa-eskwela ang mga bata sang benepisyaryo gani kun tingob na nga nahatag ang kwarta, wala sang kasiguraduhan nga i-engganyuhon pa sang mga ini ang ila mga kabataan nga mag-eskwela.// Suno diri, basta may kwarta sa bulsa, dako ang posibilidad nga gamiton gid ini gilayon ilabi na sa pagkaon.
Ang 4Ps ang isa ka poverty alleviation program sang gobyerno nga nagahatag sang financial nga bulig sa mga pigado. Samtang, wala sang problema sa gobernador sang Negros Occidental kun madayon man ukon indi ang Barangay kag Sangguniang Kabataan elections sini nga tuig.
Ang barangay kag SK elections ang natalana nga patigayunon sa Disyembre 5, 2022 apang may pending nga hagna sa Kamara nga nagapropose sa pagpostpone sini sa 2024 agud makasave sang pondo nga sarang maggamit sang gobyerno para sa COVID-19 response.
Suno kay Governor Eugenio Jose “Bong” Lacson, wala sang problema kun ipostpone ang eleksyon subong nga tuig apang dapat sa 2023 ini ang matigayon na.
Suno kay Lacson, madayon man ukon indi, maayo ang iya pagtrabaho sa mga opisyales sang mga barangay.
Nagapati man ini nga sarang maggamit sang gobyerno ang pondo para sa palaabuton nga eleksyon sa mas importante nga mga butang apang kun ipostpone gid man, dapat sa masunod nga tuig, ini ang madayon na bangud 2016 pa ang ulihi nga eleksyon kag ang iban nga opisyales sang barangay ang anom ka tuig na nga nagapungko sa pwesto.
