Indi pabor ang gobernador sang Negros Occidental sa ginapropose sang Department of Transportation nga himuon 0.75 meter ang distansya sang mga pasahero sa mga public utility jeepneys (PUJs) nagikan sa one-meter distance nga ginapatuman sa karun.
Sa interview sang Bombo Radyo kay Governor Eugenio Jose “Bong” Lacson, nagpanindugan ini nga ipabilin ang one-meter distance sa mga PUJs santo man sa health standard requirement sang World Health Organization.
Suno kay Lacson, bangud sa COVID-19 pandemic, ginalikawan ang mass gathering gani kun panubuon pa gid ang distansya sang mga pasahero sa mga PUJ, mas madamo na gid ang tawo.
Suno sa iya, kun pahanugutan ang 0.75 meter distance sa mga salakyan, dapat himuon man ini sa mga simbahan nga suno sa iya, mas makatuga sang mas dako nga posibilidad nga maglapta ang virus.
Kampante man ang gobernador nga indi ini pag-aprubahan sang inter-agency task force (IATF) bangud nagapati siya nga mangin dako nga risgo kun ini ang pahanugutan.
