Mas nagdamo pa gid ang numero sang nagpasa sang Certificate of Candidacy sa ikatatlo nga adlaw sang filing.
Kahapon, nagpasa na sang COC si Negros Occidental Governor Eugenio Jose “Bong” Lacson para sa ikatatlo nga termino sini bilang gobernador.
Sa karun duha na tanan ang nagfile sang COC para sa pagka gobernador kun sa diin una nga nagfile amo si Ferdinand Etabag Diego alyas Bongbong Gorilla nga isa ka independent candidate.
Sa pagka-bise gobernador naman, isa pa gid lamang ang nagfile sang COC nga amo si Board Member Jose Benito Alonso, ang running-mate ni Governor Bong Lacson.
Samtang kahapon pito ang nagpasa sang COC para sa pagka-alkalde nga ginalakipan sang Sipalay City, EB Magalona, Murcia, Bago City, Salvador Benedicto, Ilog, kag Hinobaan.
Sa ikaduha nga adlaw may nagfile sa Kabankalan, Talisay, Binalbagan kag Murcia, samtang sa first day naman sang filing sang COC, duha lamang ang nagpasa nga ginalakipan sang Silay kag La Carlota City.
Sa bahin naman sang congressional position isa pa gid lamang ang nagfile nga amo si Negros Occidental 6th District Congresswoman Mercedes ‘Chedeng’ Alvarez para sa last term sini.
Kag sa pagka-board member naman, apat na ang nagpasa.
Ginalauman naman nga madamo sang magafile sang COC sa adlaw sang Sabado, Dominggo, Lunes tubtob sa Martes.
