Maga-issue si Negros Occidental Governor Eugenio Jose Lacson sang executive order nga magasuspendi sang tanan nga aktibidad may kaangtanan sa tigkalalag sa probinsya.
Sa karon, wala pa sang pat-ud nga petsa kun san-o ipagwa sang gobernador ang nasambit nga EO.
Una na nga ginkumpirmar sang Metro Manila Development Authority nga pagasiraduhan ang mga sementeryo sa Metro Manila sa All Saint’s Day.
Suno kay MMDA General Manager Jojo Garcia, lunsay pabor ang tanan nga alkalde sa Metro Manila sa nasambit nga desisyon kag isa ka pagsinapol ang ila ginhiwat kagab-i agud diskusyunan ang mga pagsulundan sa implementasyon sini.
Si Manila Mayor Francisco “Isko Moreno” Domagoso ang una nga nag-anunsyar sang tinalikdan nga Martes sang iya direktiba nga siraduhan ang mga patyo kag columbaries halin Oktubre 31 tubtob Nobyembre 3.
Suno sa iya, sa ini nga mga inadlaw masami nga nagadamo ang mga tawo sa mga patyo agud magdumdum kag magduaw sa ila mga minatay.
Suno kay Moreno, indi sini luyag ang dalagko nga pagtililipon apang pahanugutan ang mga sementeryo nga magbaton sang limitado nga numero sang mga bisita antes ang Oktubre 31.
Ginsundan man ini sang pila ka mga local government units kaangay sang Manila, San Juan, Valenzuela, Mandaluyong, Pateros, Malabon, Makati kag Parañaque.
Ang Cebu City sa Central Visayas ang nagpagwa man sang kaangay nga mando.
Sang Biyernes, nag-order sanday Mandaluyong Mayor Menchie Abalos, Valenzuela Mayor Rex Gatchalian kag Cebu City Mayor Edgardo Labella sang mas malawig pa nga closure halin Oktubre 30 tubtob Nobyembre 3.
