Ginkumpirmar ni Negros Occidental Provincial Veterinarian Dr. Placida Lemana nga nakapagwa na sang memorandum si Governor Eugenio Jose “Bong” Lacson para sa mga Local Chief Executives (LGUs) sa mga pagsulundan nahanungod sa liwat nga pagbuhi sang hog industry sang probinsya matapos ang pagpanghalit sang African Swine Fever kag Hog Cholera.
Sa interview sang Bombo Radyo kay Lemana, sang Lunes ginpirmahan sang gobernador ang guidelines kag protocol nga dapat sundon sang tagsa ka local government units (LGUs).
Ini ang ginalakipan sang Pre-Sentineling, Sentinelling, Restocking kag Repopulation.
Paathag sini nga ang mga hog raisers nga luyag mag-upod sa sentinelling ang kinahanglan nga maglabay anay sa Pre-Sentinelling stage ukon ang cleaning and disinfection kun sa diin dapat matinluan anay ang mga tangkal.
Ang Provincial Veterinary Office ang magapadala naman sang technician nga magakuha sang samples sang tubig kag duta kasubong man magapatigayon sang reswabbing sa mga baboy sa premises kag tsekyaron sa laboratoryo kun ang lugar ang hilway na sa presensya sang virus.
Kasunod sini, pagahatagan sang 14 days grace period antes pa makabutang sang sentinel animals ukon paon nga baboy.
Pahanumdom ni Lemana nga ang mga sentinel animal ang dapat vaccinated na sa cholera kag nakapaidalum na sa tanan nga nagakaigo nga procedures.
Ginaduso naman sang mga ini nga ang sentinel animals ang makasurvive, ini na lamang ang himuon nga breeder.
Ang sentinel animals ang paga-obserbaran sa sulod sang 40 ka adlaw kun sa diin may-ara sang daily monitoring form nag dapat ifill-out sang mga hog raisers, samtang ini ang igamonitor man sang technician.
Matapos masurvive ang 40 ka adlaw, pagahatagan sang dugang nga 40 days grace period antes pa maqualify para sa restocking.
Pahanumdom ni Lemana, nga ang mga baboy ang pagakuhaan gihapon sang blood samples kada bulan agud matest sa ASF.
Ang ulihi nga stage sang proseso amo ang repopulation sa bilog na nga probinsya sang Negros Occidental.
