Luyag sang gobernador sang Negros Occidental nga mahibaluan ang matuod-tuod nga rason sa pagmassacre sa Pamilya Fausto sa Sitio Kangkiling, Brgy. Buenavista, Himamaylan City sang Miyerkules sang gab-i.
Nahibaluan nga pag-abot sang mga otoridad, ang iloy nga si Imelda Fausto, 49-anyos, ang yara sa idalom sang hagdan, wala na sang kabuhi, may igo sang bala sa ulo kag iban nga bahin sang lawas.
Ang bata naman sini nga si Raben, 11 anyos, Grade 5 pupil, ang nasapwan nga nagakabit sa atangan sang puertahan sa kusina kag may igo man ini sa ulo.
Ang iya magulang naman nga si Ben, 15-anyos, Grade 8 pupil, ang wala gid nakahalin sa iya hiligdaan kag diri na ini napatay tuga sang madamo nga igo sang bala samtang nasapwan ang bangkay sang amay nga si Rolly Fausto sa kamaisan kag puno na ini sang lutak.
Suno kay Governor Eugenio Jose “Bong” Lacson, ginalauman sini nga makilala na ang mga suspetsado kag maaresto agud mahatagan sang hustisya ang Pamilya Fausto.
Nagalaom ang gobernador nga yara sa maayo nga kahimtangan ang nabilin nga himata sang pamilya kag mahatag ang ginapangayo sini nga hustisya.
Pahayag ni Lacson, importante sa karun nga matrabaho sang Philippine National Police kag Philippine Army nga makilal-an ang mga suspetsado.
