Nagalaom ang gobernador sang Negros Occidental nga isa sa mangin prayoridad nga proyekto sang National Economic and Development Authority (NEDA) ang pagpalip-ot sang travel time sa tunga sang Negros Occidental kag Negros Oriental.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, nagmando ang ahensya nga pagatumuron ang top 30 projects para sa Negros Island Region (NIR) kag magapili sang tatlo para patigayunan sang feasibility studies.
Ginpamangkot pa ni Lacson ang NEDA kun ang tatlo ka mga proyekto ang isa sa Occidental, isa sa Oriental kag isa Siquijor apang ang sabat indi bangud ang tatlo ang magadepende sa mangin prayoridad nga proyekto sang ahensya.
Suno sa gobernador, nagaekspekstar ini nga ang kinahanglanon sa pag-imprubar sang connectivity ang isa sa talakayon sa tion nga magconvene ang NIR Regional Development Council matapos ang 2025 Midterm Elections sa May 2025.
