Aminado ang gobernador sa Negros Occidental nga indi malikawan ang konflikto sa pagpatigayon sang Barangay and Sangguniang Kabataan Elections, apang nagapati ini nga magapabilin nga malinong ang piniliay.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, athagon pa sini sa Commission on Election (COMELEC) ang mga Barangay nga nalakip sa listahan sang Election Areas of Concern.
Suno sa gobernador iban sa mga lugar nga mga may armed conflict sang nakaligad nga Barangay eleksyon, kaangay sang Moises Padilla sa 2019 Election nga ginpaidalum sa Comelec Control, ang authomatic naman nga nahulog sa Areas of Concern sa subong nga eleksyon.
Nahibaluan nga sa Negros Occidental, 51 ang gin-aprubahan nga Areas of Concern nga ginalakipan sang tatlo nga red category ukon areas of grave concern, 45 naman ang orange category ukon areas of immediate concern kag tatlo ang yellow category ukon areas of concern.
Nagalaom si Lacson nga panilagan pa sang husto ang nasambitan nga mga Barangay bangod may ara nga apisar mainit ang siwtwasyon sang mga nagakandidato, ini ang tubtob lamang sa habuyanay sang estorya.
Dugang pa sini nga sa masami pamilya-pamilya ang away sa Barangay Elections ukon sa tunga sang mga supporters.
Nagapati si Lacson nga apisar sa mainit nga paindisanay sang mga kandidato, magapabilin nga malinong ang eleksyon kag indi magdangat sa ginakahangaw-an nga bayolente nga konflikto.
Panugyan sang gobernador sa mga nagapapili nga kun ano man ang desisyon sang mga pumuluyo, dapat ini ang respetuhon.
