Nalakip si Governor Eugenio Jose ‘Bong’ Lacson sa indi magnubo napulo ka mga luyag magkandidato liwat sa nagkalain-lain nga posisyon sa probinsya sang Negros Occidental nga nagfile sang certificate of candidacies sa Commission on Elections kadungan sang una nga adlaw sang COC filing subong nga adlaw.
Subong nga hapon nagfile si Lacson sang COC para sa iya nga re-election sa pagka-gobernador.
Temprano pa man nagpadulong sa Social Hall sang Provincial Capitol ang pila ka incumbent officials agud nga magfile sang COC bangud diri nagplastar ang Comelec Negros Occidental.
Magapare-elect sanday Board Members Frederick Manman Ko, kag Andrew Montelibano sang Third District; Board Member Jose Benito Alonso sang 4th District; Board Member Samson Mirhan kag Araceli Somosa sang 1st District kag Board Member Jeffrey Tubola sang 6th District.
Nagfile man sang COC si Andrew Martin Torres nga bata ni anay Bago City Ramon Torres bilang board member sang 4th District; kag Hernan Emmanuel Gatuslao para sa board member sang 5th District.
Magapare-elect man si Congreswoman Ma. Lourdes Arroyo sang 4th District; samtang nagfile man si anay Congresswoman Mercedes ‘Cheding’ Alvarez bilang tiglawas sang 6th District, bulos sa iya amay nga si Congressman Genaro Alvarez; kag si 1st District Congressman Gerardo Valmayor ang nagfile naman sang COC.
Nagpadulong man sa Social Hall si Janrey Gargarita sang Binalbagan agud nga magfile sang COC sa pagka-bise gobernador apang wala ginbaton ang iya form bangud may kulang sa mga requirements, apang indi man ini disqualified.
Nangin hugot naman ang pagpatuman sang minimum health protocols sa Social Hall kun sa diin nagafill up ang mga kandidato sang health declaration form kag may mga pulis nga nagapatuman sang social distancing.
