Ginserbe sang probinsya sang Negros Occidental ang Notice to vacate masobra sa isa ka gatos ka mga pamalay sa Brgy 39 sa Bacolod City.
Suno kay Negros Occidental Governor Eugenio Jose Lacson ini ang ikaduha na nga pagserbe sang probinsya sang notice to vacate bangud sang una nga tion nagpamalibad sa pagbaton sini ang mga 112 tanan ka pamilya.
Suno kay Lacson, sang 1954 nagdonate sang mga duta ang pamilya Lizares sa Negros Occidental High School para gamiton nga school garden.
Apang ang tinutuyo ang wala nasunod, gani sang 2012 nagfile ang pamilya Lizares sang cancellation of Deed of Donation kag ini ang ginpaboran sang korte sa desisyon nga ginpagwa sang 2021.
May yara naman sang compromise agreement ang probinsya kag ang pamilya Lizares kun sa diin nakasugtan nga ang duta nga napatindugan na sang mga building sang provincial kag national government ang magapabilin na lamang sa gobyerno kag ang nabilin naman nga duta ang igabalik sa pamilya Lizares nga wala dapat sang informal settlers.
Mga 1.1 hectares ang napatindugan sang infrastructure kag masobra 7,000 square meters naman ang dapat ibalik sa mga Lizares.
Suno sa gobernador, nagacomply lamang ang probinsya sa ila nga ginkasugtan.
Lantawon man sini kun ano ang mahimo sang probinsya sa mga pamilya nga naapektuhan.
