Nagpagwa sang Executive Order 20-42 si Governor Eugenio Jose “Bong” Lacson nga nagadeklarar sang Time Out Weekend sa mga ciudad sang Talisay, Silay, Bago kag banwa sang Murcia halin Agosto 30 tubtob Agosto 31,2020 agud makapatigayon sang mass testing.
Sa EO nga ginpagwa ni Lacson kahapon sang hapon, ginpahayag sini nga ang timeout weekend ang mangin epektibo alas 12:01 sang kaagahon sa Agosto 30 tubtob alas 11:59 sang gab-i sa Agosto 31.
Apisar sini, suno sa EO, tanan nga national roads ang magapavilin nga bukas agud indi madelay ang pagbyahe sang essential goods kag mga Authorized Persons Outside Residence (APOR).
Ginspecify man sa executive order nga limitado lang ang lockdown sa mga barangay kag purok sa tagsa-tagsa ka mga LGU kag wala diri nalakip ang national roads.
Ang tagsa-tagsa ka mga LGU ang may yara sang discretion nga magdeklarar sang localized ukon targeted lockdown.
Indi naman applicable sa mga APOR ang strict home quarantine.
Suno kay Lacson, ang delivery sang tanan nga cargos sa probinsya ang indi dapat madelay bangud sa timeout weekend.
Kadungan sang patigayunon nga time-out weekend, nagdonar ang Department of Science and Technology Region 6 sang duha ka unit sang specimen ukon swab collection booth sa Negros Occidental.
Ang collection booth ang sarang nga magamit agud magkuha sang RT-PCR test sa isa ka persona.
Suno kay Lacson, tinutuyo sang nasambit nga machine ang protektahan ang mga frontliners samtang sila nagaconduct sang test bangud madamo sa karun sang mga health workers nga nagakatapikan sang virus bangud sila ang nagaatubang sa mga suspected COVID-19 patients.
Ini ang may yara sang thermal scanner, gloves, instructions para sa mga pasyente, video instruction kun paano i-operate, positive pressure senser kag airconditioning unit agud mangin komportable ang medical personnel sa sulod.
Suno sa gobernador, sarang ini nga magamit sa palaabuton nga mass testing gani tuman ang iya pagpasalamat bangud dako ini nga bulig sa probinsya.
