Nagpagwa sang Executive Order No. 21-59 Series of 2021 si Governor Eugenio Jose “Bong” Lacson nga nagadeklarar sang State of Calamity sa bilog nga probinsya sang Negros Occidental bangud sa Super Typhoon Odette.
Sa interview sang Bombo Radyo kay Vice Governor Jeffrey Ferrer, kahapon nagpasar sila sang resolusyon nga ginhingyo sang gobernador nga nagapaidalum sa probinsya sa state of calamity matapos kapin P6.2 billion nga halit nga ginbilin sang Typhoon Odette sa bilog nga Negros Occidental.
Suno kay Ferrer, sarang na nga magamit sang mga local government units ang pondo para sa calamity fund.
Suno diri, sa pagsugod sang pandemic, may nagamit na nga bahin sang calamity fund kag ang nabilin amu ang ubuson sa katapusan sang tuig agud suportahan ang mga calamity areas.
Nagapanawagan man ang bise-gobernador sa mga may ikasarang nga magbulig nga kinahanglan gid sang mga biktima sa Southern Negros sang pagkaon, tubig kag kuryente.
Gindugang man sini nga tanan nga bulig nga mahatag ang ila gid ginawelcome kag ginabaton.
Ginakalipay man sini nga nagapalab-ot sang bulig ang mga local government units sa northern kag central Negros para sa mga naapektuhan sa Southern Negros.
Nagapangamuyo man ini nga magapadayon ang bulig nga nagaabot para sa mga biktima sang Typhoon Odette.
