Gilayon nga ginbutang sa half-mast ang hayahay sang Pilipinas sa Kapitolyo sang probinsya sang Negros Occidental bilang pagkasubo sa pagtaliwan ni anay Presidente Benigno Simeon ‘Noynoy’ Aquino III.
Nag-upod man ang mga local government units sa Negros Occidental sa pagbutang sang Philippine flag sa half-mast.
Sa interview sang Bombo Radyo kay Governor Eugenio Jose ‘Bong’ Lacson, nagpalab-ot ini sang simpatiya sa pamilya Aquino.
Aminado ang gobernador nga indi niya malipatan ang hinimuan ni Pnoy para sa Pilipinas ilabi na sa ekonomiya.
Kada tuig nga yara sa opisina si Noynoy suno sa gobernador, mabaskog ang ekonomiya sang pungsod nga natalupangdan man sang international community.
Dako ang pagpasalamat sang gobernador sa pag-apruba sang anay chief executive sa pagtukod sang Negros Island Region kag nagapati ini nga maayo nga presidente si Aquino.
Sa una nga State of the Nation Address ni PNoy, nabatian ang pagpasiguro sini nga ginadumilian ang paggamit sang wangwang bisan magutok ang dalagan sang trapiko sa EDSA, nga nangin simbolo sang equality sa tanan nga mga Pilipino.
Sa idalom sang administrasyon sang anay presidente, nag-file ang Pilipinas sang reklamo sa Permanent Court of Arbitration batok sa pag-akupar sang China sa West Philippine Sea kun sa diin nakuha sang Pilipinas ang paborable nga desisyon.
Ginlaragway sang gobernador si Noynoy Aquino bilang desente nga presidente, mapisan kag may pag-ulikid sa mga Pilipino.
Indi mahatagan ni Lacson sang perfect score si Aquino apang nagapati ini nga natuman sang anay chief executive ang mga butang nga iya ginpromisa sang tiempo kampanya.
