Nagpanawagan si Governor Eugenio Jose ‘Bong’ Lacson sa mga Negrense nga mag-upod sa Earth Hour alas-8:30 tubtub alas-9:30 karon sa gab-i.
Suno kay Lacson, kabahin ang Negros Occidental sang minilyon ka mga tawo sa bilog nga kalibutan nga magaselebrar sang Earth Hour ukon isa ka oras nga pagswitch off sang non-essential lights kag electrical appliances.
Suno diri, nagaupod ang Kapitolyo sa Earth Hour sa sulod sang pila na ka tuig kag magapadayon ini sa pagsuporta sa sini nga global movement.
Suno kay Lacson, symbolic ang kahiwatan kag reminder sa mga pumuluyo nga may planeta nga Earth nga dapat isave.
Bangud sini, nagpanawagan si Lacson sa mga pamalay kag komunidad nga mag-upod sa Earth Hour paagi sa pagpatay sang non-essential lights, TV set, electric fan ukon airconditioning unit.
Gin-engganyo man sini ang mga millenials nga ishut down ang ila computer sa sulod sang isa ka oras bilang isa ka gamay nga sakripisyo agud nga maaddress ang mga issues sa palibot.
Nagpanawagan man ini nga maghimo sang tikang kada adlaw agud nga mapakita ang effort nga masave ang Planet Earth.
Sa mga masindi naman sang kandila, nagpanugyan ang gobernador nga indi pagpabay-an agud nga makalikaw sa sunog.
Aminado man ang gobernador nga may pila ka mga botante nga nagalantaw sa plano sang isa ka kandidato para sa environment bilang basehan sa ila nga desisyon.
Nagalaom man si Lacson nga indi makalab-ot alas-8:30 sang gab-i ang political rally sang mga kandidato subong nga adlaw.
