Nagpanugyan si Negros Occidental Governor Eugenio Jose “Bong” Lacson nga walay sapayan sang variants nga nagalapta, dapat mangin vigilante ang tanan, maghalong kag magsunod gid sa mga health protocols.
Madumduman nga kahapon, gin-anunsyar nga nadetect sa isa ka 35-anyos nga iloy sa banwa sang Valladolid ang labing una nga kaso sang Lambda variant sang COVID-19 sa Pilipinas.
Natingala ang provincial government kun paano natapikan sang Lambda variant ang iloy nga wala pa nakagwa sa probinsya sang Negros Occidental sa sulod sang pila na ka tuig kag wala man sang himata nga nagikan sa abroad.
Isa pa sa kwestyon sang provincial government kun ngaa tanan sini nga close contacts kasubong man ang iya pamilya ang lunsay negatibo man sa COVID-19 kag wala sang bisan isa nga nagpositibo apisar nga ginakabig nga highly transmissible ang Lambda variant.
Suno kay Lacson, ginakwestiyun ini sang mga health officials sa probinsya gani luyag sang Provincial Health Office nga ipaverify ini sa PGC.
Suno sa gobernador, may mga variants man nga nagatuhaw, wala nagakambyo ang guidelines nagikan sa Department of Health kag ini ang pagsunod sa minimum health standards.
Suno diri, dapat mangin vigilante ang tagsa-tagsa may variant man sang COVID ukon wala.
