Nagpanawagan ang gobernador sang probinsya sang Negros Occidental sa mga residente nga apektado sang eruption sang Mt Kanlaon nga mag-upod na lamang sa forced evacuation kag indi na magpabilin pa sa tagsa nga mga panimalay agud nga mahilway.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, naglibot ini sa mga banwa kag ciudad nga nahalitan sang ashfall gikan sa paglupok sang Bulkan Kanlaon sa tuyo nga masiguro nga napalab-ot ang bulig gikan sa provincial government.
Nagpadulong ini sa banwa sang La Castellana kag ciudad sang La Carlota kag nakita nga nahatag sa mga residente ang mga foodpacks kag tubig kag sila ang na-assist sang maayo.
Gintsekyar man sini ang mga sitwasyon sang mga residente nga nagpabilin sa ila nga mga balay kun sila ang nahatagan man sang bulig.
Samtang, may yara man sang mga evacuees nga luyag na sa karun nga magpauli apang wala pa ginpahanugotan samtang yara sa gihapon sa alert level 2 ang Mt Kanlaon.
Suno sa gobernador, anum tanan ka local government units ang apektado nga ginalakipan sang ciudad sang San Carlos, Bago, La Carlota, kag banwa sang La Castellana, Moises Padilla kag Pontevedra.
Nagpanawagan ang gobernador sa tanan nga mga residente nga apektado sang pag-alburuto sang bulkan nga magsunod na lamang kun may yara sang forced evacuation bangod yara man ang gobyerno para magpalab-ot sang bulig.
