Kalabanan nga mga gobernador sa bilog nga pungsod ang indi komporme nga mangin optional nalang ang pagsuksok sang face mask sa open area, kaangay sang ginpatuman sang Cebu Province, santo sa mandu ni Governor Gwendolyn Garcia.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, halin sa panugod, nagasunod ini sa protocols nga ginadagdag sang Inter-Agency Task Force angot sa COVID.
Nagapati ang gobernador nga ara pa ang COVID sa palibot kag sa maayo nga palad, wala na sang seryoso nga kaso sa probinsya.
Sa karon, tatlo nalang ang pasyente sa Cadiz Hospital nga amo ang COVID designate hospital sang Negros Occidental.
Nagapati ang gobernador nga dapat padayunon gihapon ang pagsuksok sang face mask.
Bwas nga adlaw, may final assembly ang League of Provinces of the Philippines sa Mandaluyong kag isa sa mga istoryahan amo ang mandatory nga pagsuksok sang face mask.
Sa group chat sang mga gobernador, nagagwa sa survey suno kay Lacson nga tanan nga gobernador ang komporme nga padayunon ang mandatory nga pagsuksok sang face mask.
Aminado ini nga ginakonsiderar naman sang IATF ang pag-abot sang tion nga indi na magfacemask apang wala pa ini ginarekomendar sang mga eksperto subong.
Kampante naman ini nga sa amat-amat nga mga patakaran sang gobyerno, magabalik na sa normalcy ang pagpangabuhi sang mga Pilipino.
