Ginpasalig sang gobernador sang Negros Occidental nga napain lamang ang pondo para sa permanent relocation site sang mga nagapuyo sa sulod sang 4km Permanent Danger Zone sang Bulkan Kanlaon sa banwa sang La Castellana.
Sa interview sang Bombo Radyo Bacolod kay Governor Eugenio Jose “Bong” Lacson, ginpahibalo na sa iya ni La Castellana Mayor Rhumyla Nicor Mangilimutan nga wala gin-aprubahan sang Mines and Geosciences Bureau (MGB) ang gindonar nga duta agud mangin relocation site sa Barangay Manghanoy sa nasambitan nga banwa.
Ini bangod natumod nga malapit sa sanitary landfill ang nasambitan nga lokasyon.
13 ka pamilya nga ginabug-usan sang 36 ka indibidwal kuntani ang natalana nga isaylo sa area.
Suno kay Lacson, gikan sa P50 million nga donasyon sang Malacañang tinalikdan nga tuig, sila ang nagpain sang P14 million para sa pagdevelop sang relocation area.
Karun nga wala na-aprubahan ang una nga lokasyon, magapabilin lamang sa provincial government ang budget tubtob nga makakita na sang panibag-o nga lugar.
Magluwas diri, ang mga apektado nga local government unit kalakip na ang banwa sang La Castellana, ang may separado man nga request sa national government para sa dugang nga budget.
