Pagatsekyaron sang gobernador sa Negros Occidental ang proyekto sang National Irrigation Administration nga irrigation canal sa Barangay Sta. Rosa, Murcia nga gina-alegar natapos sang 2020 apang wala gid mapatubdan sang tubig.
Una nga nagdangop sa Bombo Radyo Bacolod ang pila ka residente sa lugar nga nagapanawagan nga sila ang mabuligan sang gobernador sa ila nga problema.
Sa interview sang Bombo Radyo Bacolod kay Ronilo Robaton, isa sa mga mangunguma sa lugar, wala gid bisan isa ka bes na-iligan sang tubig ang nasambitan nga irrigation canal humalin sang ini ang natapos sang 2020.
Ini ang dako nga problema para sa ila nga mga mangunguma nga wala sang matanom kag wala sang makaon.
Gani, ginapanawagan sang mga ini nga mapadasig ang pagkay-o sang irrigation canal.
Suno naman sa isa pa ka tagreklamo, ang proyekto ang ginpangaupyo nila mismo sa National Office ang NIA.
Apang ini ang wala man nila mapuslan bangod wala man ginalabayan sang tubig.
Suno diri, wala na sila sang labot kun sin-o man ang contractor apang dapat nga manabat diri ang NIA.
Panawagan sini nga mapadasig ang pagpatubig sa irrigation canal agud sila ang maka-umpisa naman sang pagtanom.
Sa pihak nga bahin, sa una nga paghinun-anon kay Engr. Isaias Melendez, ang Division Manager sa Negros Occidental Irrigation Office, ginpahayag sini nga napatubdan na ang area apang ang supply ang igo lamang para sa duha ka croppings.
Ginalantaw ni Negros Occidemn nga ang mga nagareklamo ang nagtanom para sa third croppings kag wala nalab-utan sang tubig.
Paathag naman sini padayun pa ang pagpatigayon sang rectifying sa nasambitan nga irrigation canal.
Apang sa pagpadulong mismo sang Bombo News Team sa area, nakita nga nagapasaka ang canal kag kaangay nga impossible nga makasaka ang tubig.
Sa pihak nga bahin, nagpasalig naman ang gobernador nga tsekyaron sini kay Melendez ang detalye sang proyekto.
Sa interview sang Bombo Radyo Bacolod, lantawon sini kun san-o nag-umpisa ang proyekto kag sin-o ang intended beneficiaries.
Aminado ini nga nagasampok ang reklamo sang mga residente nga nagapahayag nga wala pa nakaagi nalabayan sang tubig ang irrigation canal, kag ang pahayag ni Melendez nga ini ang napatubdan na.
