Kasunod sa pagpatigayon sang Thanksgiving kag New Year’s Mass sa Social Hall sa Negros Occidental Provincial Capitol kahapon, ginpatpat man sang gobernador ang mga nangin accomplishments sang iya administrasyon sang 2021.
Kalakip na diri ang pagpakig-away sa COVID-19, pag-atubang sa bagyo Odette, mga awards nga nabatun sang probinsya kag iban pa, kalakip na ang mga nagenerate nga income apisar sang pandemya.
Ginpasalamatan man ni Governor Eugenio Jose “Bong” Lacson, ang mga empleyado sa Provincial Capitol sa ila nga nangin serbisyo.
Suno kay Lacson, nagdangat sa 2.9 billion ang nangin kahalitan sang bagyo Odette sa crafts and fisheries kag nakaapekto sa 1,051 ka mga manugpanagat kag masobra 30,000 ka mga mangunguma.
Nagapatigayon man ang Provincial Government sang rehabilitation program sa mga nahalitan sang bagyo.
Ginpahayag man ni Lacson nga nagdangat na sa 60 porsyento sang target population sa probinsya sang Negros Occidental ang nakabatun sang isa ukon duha ka doses sang COVID-19 vaccine.
Ini ang nagdangat na sa masobra 1.1 million nga mga Negrosanon.
Samtang nagdangat naman sa masobra 1,000 ang mga napatay bangod sa virus sa pagtakop sang 2021.
Sa pihak nga bahin, ginpahayag man sang gobernador nga may nabuksan na nga 94 ka mga tourism site sang tuig 2021 kag masobra 900 ka mga tourism workers ang fully vaccinated na.
Sang 2021, ang Sangguniang Panlalawigan ang naka-enact sang siyam ka mga appropriation ordinances; 1,111 ka naaprubahan nga resolusyon; 17 ka regular ordinances; 16 ka resolution may kaangtanan sa paghatag sang medical assistance; apat ka resolution sa paghatag sang special risk allowances; anom ka consultancy agreement; 31 ka resolusyon para sa Agriculture Programs; 17 ka resolution para sa Educational Program; 117 ka resolution may kaangtanan sa financial concerns kag 158 ka resolusyon nahanungod sa legal matters.
Madamo man sang mga awards nga nabatun ang probinsya sang 2021.
Ginpahayag man ni Lacson sa programa nga P64.55 million ang nagasto sang probinsya sa pag-upgrade sang mga equipments kag pasilidad sang mga district hospitals sa Negros Occidental.
