Nakigkita si Negros Occidental Governor Eugenio Jose “Bong” Lacson sa Guam Econonomic Authority kag Guam Visitors Bureau agud malantaw kun sarang man nga maimbita ang mga Guamanians kag iban pa nga foreign nationals nga magpadulong sa probinsya.
Sang Hunyo 7 tubtob Hunyo 9, nagpadulong ang gobernador sa Guam agud mangin guest of honor sa selebrasyon sang Independence Day sa nasambit nga teritoryo.
Kaupod man ni Lacson ang isa sa mga executive assistant sini nga si ChaCha Magallanes Tan, officer-in-charge sang Provincial Tourism Office nga si Cheryl Decena, kag Provincial Administrator Atty. Rayfrando Diaz.
Suno kay Lacson, ini na ang iya ikatatlo nga pagbisita sa Guam kag sa una sini nga mga pagbisita kun sa diin wala pa sang pandemic, nagadangat sa linibo ang turista, apang sa karun, tuman na lamang ka limitado.
Suno diri, kaangay sang Negros Occidental, bag-o pa lamang liwat nagbukas ang turismo sa Guam.
Apang may mga foreign nationals naman nga nagabisita kag amu man ini ang iya luyag para sa probinsya, nga may magbisita nga mga turista nagikan sa luwas sang pungsod.
Suno diri, handa ang gobyerno sang Guam nga magbulig sa Negros Occidental tuhoy sa economic activities kag turismo.
Nakigkita man ang gobernador sa mga alkalde kag excited na ini sa pagforge sang sister cities, nga beneficial sa duha ka bahin.
Ginpahayag man sini nga igapabilin sa probinsya ang pagsuksok sang face mask kag pagpatuman sang social distancing.
Ginakabig man sini nga pahanumdum ang selebrasyon sang Independence Day kahapon nga indi mahapos ang kahilwayan nga atun ginaagom bangud madamo sang kabuhi ang nadula sadto agud ini ang makuha sang pungsod.
