Kadungan sang ika-62 nga kaadlawan ni Governor Eugenio Jose “Bong” Lacson, ginpatigayon man ang lights on ceremony sang mga lanterns kag Christmas decorations sa Provincial Capitol kagab-i.
Ang seremonya ang may tema nga “Paskwa Puno sang Paglaom, Para sa Tagsa ka Negrosanon”.
Sa speech ni Governor Lacson, ginpahayag sini nga ang Paskwa amu ang paborito nga tion sang tanan apang bangud sa pandemic, napunggan ang mahilway nga pagselebrar sini.
Ginhangkat sini ang tagsa-tagsa nga magtulok sa sirkumstansya sa lain nga perspektibo kag ini ang pagkabata sang Manluluwas.
Nagpahanumdum ini sang essence sang mga Negrense nga amu ang paghatag kag pagbulig sa isigkapareho.
Gindugang man sini nga dapat dumdumon sini nga tion ang pagpakig-unong, paghigugma kag pag-isa gani dapat magpadayon sa kabuhi nga may pagtuo.
Samtang, igapasa na subong nga adlaw sa Sangguniang Panlalawigan ang hingyo sang gobernador nga Christmas bonus para sa mga empleyado sang Kapitolyo.
Suno kay Lacson, magabaton ang mga regular kag casual employees sang P65,000 nga Christmas bonus kag ginalauman nga ini ang maaprubahan sang Sangguniang Panlalawigan subong nga adlaw.
