Nagbisita si Governor Eugenio Jose ‘Bong’ Lacson sa haya ni Negros Oriental Roel Degamo sa ila nga balay sa Barangay Junob, Dumaguete City kaina sang aga.
Sa interview sang Bombo Radyo kay Lacson, madamo na sang tawo nga nagabisita sa balay nanday Degamo bisan aga pa.
Sa ila nga pag-istorya, nagalaom ang misis ni Degamo nga si Pamplona Mayor Janice Degamo nga matumod na ang mastermind sa krimen agud nga mahatagan sang hustisya ang kamatayon sang gobernador kag sang walo ka mga sibilyan nga naulamid.
Sang nagbiya si Lacson, nag-abot man sa Dumaguete si Senate President Juan Miguel Zubiri agud nga magbisita sa haya.
Antes kay Lacson, nagbisita man sanday Senators Bong Revilla, Jinggoy Estrada, Robin Padilla kag Bong Go.
May isa man ka pamilya nga nagikan pa sa Cordova, Cebu nga kapareho apelyido sa gobernador.
Santo sa schedule as of today, sa Huwebes sa masunod nga semana ang lubong ni Degamo.
Aminado si Lacson nga nagkitaay sila ni Degamo bangud sa ila nga posisyon kag ang ulihi nila nga pagkitaay amo ang meeting sa Dumaguete City sang Pebrero 1 kun sa diin mismo si Lacson ang nagpadulong didto agud maistorya si Degamo angot sa Negros Island Region.
Kaina, ginsugiran ini ni Mayor Degamo nga tuman ka malipayon ang iya mister sang gab-i matapos ang meeting bangud ginbisitahan ini sang iya nga counterpart sa Negros Occidental.
