Nagpanugyan si Governor Eugenio Jose ‘Bong’ Lacson sa mga nagdaog sa nagtakop nga Barangay kag Sangguniang Kabataan elections sa Negros Occidental nga magtrabaho gilayon bangud malip-ot lang ang tinion sang ila nga pagpungko sa pwesto.
Sa interview sang Bombo Radyo kay Lacson, ginpanginbulahan sini ang tanan nga mga pumuluyo nga nagcooperate agud nga mangin malinong kag matawhay ang eleksyon.
Nagpasalamat man ini sa Commission on Elections sa paghanda antes, sa adlaw mismo, kag pagkatapos sang eleksyon kag sa iban nga ahensya sang gobyerno kaangay sang uniformed personnel.
Mahimo suno sa iya nga hingyuon niya sa Sangguniang Panlalawigan nga magpasar sang resolusyon nga nagapasalamat sa mga natungdan nga ahensya.
Suno sa gobernador, may hot spot areas sa Negros Occidental apang indi ini bangud sa violence may kaangtanan sa eleksyon.
Nagpanginbulahan ang gobernador sa tanan nga mga nagdaog.
Suno diri, may yara lamang sang duha ka tuig ang mga nagdaog agud nga magpungko gani dapat nga magtrabaho gilayon.
Suno sa amay sang probinsya, indi dapat pag-uyangan sang second termer ukon third termer ang bag-o nga tsansa nga ginhatag sa ila, sa baylo, gamiton ini agud nga magserbisyo gilayon.
Ginpasalig man sini nga magapadayon ang assistance to barangays nga programa sang provincial government.
Nagpanginbulahan man ini sa mga nagdaog sa Sangguniang Kabataan kag bilang first-timers sa palangakuan, nagpanugyan ang gobernador sa ila nga makabulig sa mga ini kun sila ang magtambong sa mga seminar sang Department of the Interior and Local Government.
