Nagpanugyan ang gobernador sa probinsya sang Negros Occidental nga magbook na sang ticket pila ka adlaw antes sang ipatuman nga moratorium para sa mga returning residents sang probinsya.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, gin-athag sini nga ang mga mapauli subong nga Disyembre ang indi na Locally Stranded Individuals (LSI) bangud sila ang mga Negrense nga nagatrabaho sa luwas sang probinsya kag ginatake advantage na lamang ang christmas break agud nga makaupod ang ila pamilya subong nga holiday season.
Nagpanawagan man si Lacson sa tanan nga mga Negrense nga sa may luyag nga magselebrar sang paskwa kaupod ang ila pamilya nga dapat sa Disyembre 20 nakapauli na sila diri.
Ginpahayag man ni Lacson nga wala sang additional flight ang mga airline companies kadungan sa pagpatuman sang mga moratorium sa tagsa ka LGU sa probinsya nga aprubado naman sang Regional Inter-Agency Task Force (RIATF).
Nagpanugyan man ini sa mga Negrense nga kun nagalain ang pamatyag indi nalang magbiyahe agud magpauli para malikawan nga makalaton sa atun isig kapareho.
Nagapadayon man ang swab testing sa airport kag seaports sa tion nga makaabot na sa probin sya.
Suno kay Lacson, sa pihak sang mga pagtilaw nga ginapangatubang sang tanan bangud sa pandemiya, indi naton dapat pagkalimtan ang pagselebrar sang Paskwa.
