Wala napunggan nga magtulo ang luha ni Governor Eugenio Jose Lacson sa iya mensahe sa ginpatigayon nga community prayer nga ginhiwat sa capitol grounds kahapon sang hapon.
Ang nasambit nga community prayer ang ginpangunahan ni Fr. Cris Gonzales sang Social Action Center sang Diocese of Bacolod kag gintambungan sang mga opisyales kag empleyado sang Kapitolyo samtang gina-practice ang social distancing.
Suno sa gobernador, ginahimo gid sang provincial government ang tanan agud matapna ang coronavirus disease 2019 (COVID-19) kag indi na ini maglapta pa sa probinsya.
Suno sa iya, wala gid nakaagi sang una nga nagpatigayon sang community quarantine kag nagsirado sang borders kag mga ports ang probinsya.
Ginatugyan na lamang sini ang tanan sa kaluoy kag grasya sang Ginoo.
Suno kay Lacson, wala sang may ginapili ang balatian bangud bisan ang mga first world countries ang apektado man sang virus.
Apang nagapati ang gobernador nga wala kita naga-isahanon sa nasambit nga krisis bangud yara ang Ginoo nga magabulig sa aton.
