Ginpasiguro ni Negros Occidental Governor Eugenio Jose “Bong” Lacson nga welcome sa pagbisita sa probinsya si National Task Force (NTF) COVID-19 policy chief implementer Sec. Carlito Galvez Jr. may COVID man ukon wala.
Madumduman nga ginpahayag ni Galvez nga isa sa pagabisitahan sang mga Cabinet officials ang Negros Occidental bangud kinahanglan sang mga ini sang bulig sa pagmanage sang pandemic.
Sa interview sang Bombo Radyo Bacolod kay Lacson, aminado ini nga mataas sa gihapon ang kaso sang coronavirus sa probinsya.
Sang damlag lang, nakit-an sini nga may yara sang guplyada nga pagtaas sang infections sa Kabankalan City kag San Carlos City.
Ginpaathag man sang gobernador nga ang mataas nga kaso nga nagakatabo sa Talisay City, Silay City, Bago City kag banwa sang Murcia ang normal lamang bangud man sa COVID situation sa Bacolod.
Nagapati naman ini nga ma-manage sang probinsya ang COVID cases bangud iya naobserbahan nga sa nakaligad nga mga inadlaw, wala na nalakip sa top 5 provinces nga may mataas nga kaso sang coronavirus sa bilog nga Pilipinas ang Negros Occidental.
Suno kay Lacson, isa sa mga rason kun ngaa nagasaka ang kaso sang balatian sa probinsya amo nga kalabanan sa mga pumuluyo ang nagapakampante lamang.
Nagpanugyan ang gobernador sa tanan ilabi na sa mga empleyado sa mga pampubliko ukon pribado nga mga kompaniya nga kun malain ang pamatyag, indi nalang magtrabaho.
Liwat naman sini nga ginpahanumdom nga dapat magsunod gid sa proper health protocol agud nga indi na maglapta pa ang virus.
