Nagapati si Negros Occidental Governor Eugenio Jose Lacson nga manageable gihapon ang kaso sang COVID sa probinsya.
Suno kay Lacson, mas manubo ang active COVID cases subong kun ikumparar sang tinalikdan nga mga binulan nga nagdangat sa 2,400 tubtub 2,600.
As of kahapon, 1,845 ang active cases sa Negros Occidental kag 43 ang nagdugang nga kaso.
Ini man ang rason kun ngaa wala ginkompormehan sang gobernador ang ginaduso sang medical community nga magpatuman sang border closure.
Suno kay Lacson, mas ma-manage pa gid sang maayo ang COVID cases kun nagakooperar ang tanan nga mga residente.
Ginpanugyan sang gobernador nga magsuksok sang face mask bisan yara sa sulod sang balay kag indi mag-atubangay sa isa ka lamesa kun magkaon.
Kampante si Lacson nga kun sundon lang ang health protocols, ma-manage sang maayo ang COVID cases.
Sa pinakaulihi nga report, may duha ka empleyado sa Office of the Governor nga nagpositibo sa COVID test gani isolated ang opisina sa karon.
Sa ciudad sang Cadiz naman, nagpagwa sang executive order si Mayor Salvador Escalante nga nagadumili sang social gathering kag ginadumili man ang pag-atubangay sang mga nagakaon sa mga kapehan.
