Kasunod sang duha ka kaso sang Delta variant sang coronavirus nga narekord sa probinsya sang Antique, nagpanawagan ang gobernador sang Negros Occidental sa mga Negrense nga indi magpanic.
Sa interview sang Bombo Radyo kay Governor Eugenio Jose ‘Bong’ Lacson, nagpahibalo si DOH Region 6 director Adriano Suba-an sang nagpatigayon ini sang courtesy visit sa Office of the Governor sang tinalikdan nga semana, nga dapat handaan ang pagsulod sang Delta variant nga una nga nadetect sa India nga mas makalalaton sangsa original nga strain.
Gin-ako ni Lacson nga mabudlayan ang Pilipinas sa healthcare system kun matabo man sa pungsod ang natabo sa India kag sa Indonesia nga subong amo naman ang bag-o nga epicenter sang COVID outbreak sa Asya.
Suno sa gobernador, dapat nga maghatag sang share ang kada pumuluyo bangud may ideya naman ang tanan sa gin-agyan sang India kag ang ginaeksperyensya subong sang Indonesia.
Nagpanawagan ang chief executive nga dapat mabalik ang kada pumuluyo sa basic, kaangay sang pagsuksok sang face mask kag face shield, pag-obserbar sang social distancing kag pagpabakuna.
Aminado ang amay sang probinsya nga limitado pa ang supply sang bakuna gani nagpanawagan ini sa mga senior citizens nga indi magbalibad kun schedule na sang ila vaccination.
Nagaupod man si Lacson sa panawagan sang mga gobernador nga buksan na sa tanan ang vaccination agud madasig malab-ot ang herd immunity.
Suno kay Lacson, general community quarantine ang nagakadapat nga quarantine status sang Negros Occidental gani indi dapat magpanic, kundi magsunod sa health protocol kag ipabilin nga healthy ang lawas.
