Nagpasalamat si Negros Occidental Governor Eugenio Jose ‘Bong’ Lacson nga nalakip ang Negros sa mga priority areas nga makabaton sang bakuna batok sa coronavirus.
Una diri, gintumod ni Vaccine czar Carlito Galvez ang bag-o nga lugar nga hatagan sang prayoridad sa deployment sang limitado nga COVID-19 vaccines.
Ini ang ginlakipan sag Bataan, Pangasinan, Iligan, Tacloban, Ormoc, Isabela, Butuan, Samar, Bicol, Negros, MIMAROPA kalakip na ang Palawan, Davao de Oro, Tarlac, Aurora, kag Quezon.
Sa interview sang Bombo Radyo kay Lacson, nagpasalamat ini nga gintuman ni Galvez ang nauna niya nga pahayag nga masobra 700,000 doses sang COVID vaccines ang ipasulod sa Western Visayas subong nga bulan sang Hulyo.
Nagpanawagan si Lacson sa mga local government units nga ibakuna gilayon sa sulod sang lima ka adlaw ang tanan nga bakuna nga nabaton.
Sa karon suno sa gobernador, madamo naman nga LGUs nga may 100 percent nga performance sa COVID vaccination.
Aminado si Lacson nga bangud may nag-abot nga 1.6 million doses sang Johnson & Johnson COVID vaccines, madamo naman ang manawag sa iya kag mag-ayo nga amo ini nga brand ang ila luyag bangud madamo ang nagaprefer sang Western-developed vaccines.
Suno diri, ang pinakamaayo nga bakuna amo ang bakuna nga available.
Nagpanawagan man ini sa mga fully vaccinated individuals nga maghalong gihapon agud maprotektahan ang lawas kag ang iban.
