Nagapati si Negros Occidental Governor Eugenio Jose ‘Bong’ Lacson nga mahimo na nga kabigon nga ordinary flu ang COVID kag vaccination ang solusyon agud nga mabatuan ang virus.
Ini ang kasunod sang pahayag ni President Ferdinand ‘Bongbong’ Marcos Jr. sa iya nga State of the Nation Address kahapon nga indi na magpatuman ang gobyerno sang lockdown bangud sa COVID.
Suno kay Lacson, ginarekomendar sang mga health experts ang vaccination gani nagahingyo ini sa mga Negrense nga unvaccinated pa nga ireconsider ang desisyon agud nga mas mapabaskog ang ikaayong-lawas.
Aminado ang gobernador nga dapat pasanyugon ang kampanya para sa booster shots apang indi madeny nga may mga senior citizens nga wala pa gid natublukan sang first dose.
Nagapati naman si Lacson nga mas makabulig ang gobyerno sa mga pumuluyo kun mapanubuan ang presyo sang branded nga bulong paagi sa pagpasulod sang generic drugs nga isa man sa namention ni Marcos.
Nasuguran naman ini sang administrasyon ni anay Presidente Gloria Macapagal-Arroyo kag namention ni Marcos sa iya nga SONA kahapon.
Kun magmadinalag-on ang gobyerno sa sini nga plano suno sa gobernador, mga pumuluyo man gihapon ang makabenepisyo sini.
Indi naman matago ang kalipay sang mga mamalidha sa pahayag sang presidente nga mabukas man sang specialty hospitals sa mga probinsya apang pamangkot pa kun ano nga probinsya ang prayoridad sa Visayas kag Mindanao.
