BACOLOD CITY – Priso na ang isa ka Grade 9 student sa ciudad sang Bacolod matapos madakpan sa buybust operation sa likod lang sang ila school campus.
Ang 19-anyos nga si Reinze June Tiongco sang Purok Kaingin, Barangay Punta Taytay, Bacolod City ang nadakpan sa likod sang Sum-ag National High School, alas-02:30 sini nga hapon.
Sa ginpatigayon nga operasyon sang Police Station 9, nakapalagyo ang subject kag nabilin si Tiongco sa lugar.
Sang gin-usisa ang bag sini, nakuha sa iya ang isa stick sang marijuana.
Sa interview sang Bombo Radyo Bacolod, ginpahayag ni Tiongco nga apat ka iban pa nga estudyante ang kaupod sini sa paghithit sang marijuana.
Ginbuyagyag man sini nga madamo pa nga estudyante gikan sa Grade 8 tubtob senior high school ang nagagamit sang marijuana.
Suno diri, nagtratrabaho siya sa construction kada Sabado agud may inugbakal sang kunsumo nga marijuana nga nagabalor sang P500.
Ginatunga lamang sang mga ini ang marijuana kun maghithit sa sulod sang comfort room kaupod ang iban nga mga estudyante.
