Duha ka graduate sang Technological University of the Philippines – Visayas (TUPV) ang nangin Top Notcher sa April 2025 Electronic Technicians Licensure Examination.
Ang mga nakakuha sang Top 1 amo sanday Jan Frederick Alegado Valenton kag Jayvee Caballes Fuentebella, nga lunsay may average ratings nga 95 percent.
Sa intreview sang Bombo Radyo Bacolod kay Fuentebella, duha ka pasinawan ang iya ginkuha, ang Electronics Engineering Technology Licensure Examination sang Abril 2 kag 3 kag ang Electronic Technicians Licensure Examinations sang Abril 4.
Pahayag sini nga manghod lamang niya ang iya ginpahibalo nga manuggwa ang result sang pasinawan kagab-i.
Suno kay Fuentebella, nagatulog na ang iya ginikanan sang maggwa ang result kag una sini nga gintsekyar ang para sa Engineering.
Sa kalipay, nagsinggitan ini nga “Engineer nako ma!!”, kag sunod sini iya naman gincheck ang sa Technicians.
Apang list lamang ang iya gintamdan gani nalipay na ini sang makita nga siya ang nakapasar man.
Suno diri, kun wala sang may nagcongratulate sa iya sa ila nga group chat, didto palang niya ginbalikan ang rankings kag nakita nga siya ang isa sa mga Top Notchers.
Ginpasalamatan man sini ang ila mga professors bangod sa pagpadulong pa lamang sa examination area, segurado na sang mga ini nga sila ang preparado sa pasinawan.
Aminado ini nga lain sa iya gina-antisipar ang mga math questions sa engineering, apang sa technicians pagkakita pa lamang sini sang pamangkot, positibo na si Fuentebella nga siya ang makasulod sa ranking.
Suno diri, ang achievement ang bugay sang Ginoo.
Si Fuentebella ang scholar sang Department of Science and Technology (DOST), gani sila ang required nga magrender sang duty sa gobyerno depende sa kalawigon sang nabatun nga scholarship, magluwas lamang kun mahatagan sang authority nga makatrabaho sa iban.
Nagalaom naman ini nga sa iya una nga trabaho bilang licensed engineer kag licensed technician, diri lamang sa Negros Occidental agud indi tuman ka layo sa iya pamilya.
Panugyan sini sa iban nga nagahandom nga indi lamang madulaan sang paglaom, bangod tanan ang posible kun nagatinguha.
