Ginkumpirmar sang Deputy Chief of Police sang Bago City Police Station nga may yara sang nakita nga hand grenade nga highly explosive sa Bago City.
Sa interview sang Bombo Radyo Bacolod kay Police Captain Emman Anacleto, may nagtawag sa ila nga concerned citizen kag nagpahibalo nga may yara sang nakita nga gina-alegar granada sa Purok Kanlaon, Barangay Don Jorge Araneta, Bago City.
Suno kay Anacleto gilayon man nila ginpahibalo ang Regional Explosive Ordnance Disposal (EOD) and Canine Unit (RECU) sang Police Regional Office-Negros Island Region.
Ginpangunahan man ni Anacleto ang pagresponde sa lugar kag sa ulihi natumod nga M26 hand grenade ang nagkita.
Ang nasambit nga granada ang nalubong kag nakutkutan sang mga bata nga nagapangkuha sang scrap.
Nakita naman sang concerned citizen nga ginahampangan nila ini gani nagtawag man sang police assistance.
Sang gin-usisa sang mga kapulisan ini ang nakumpirmar nga granada kag may dako gid nga posibilidad nga maglupok ini bisan pa nga ini ang daan na.
Nagpanugyan si Anacleto sa mga residente nga kun may makita nga butang nga daw kaanggid sang explosives kaangay sang granada indi pagpalapitan kag magtawag gilayon sang police assistance.
