Narecover sang PNP Criminal Investigation and Detection Group, Special Action Force, Philippine Army kag Police Regional Office 7 ang isa ka hand grenade, isa ka .45 caliber pistol kag magazine; duha ka .40 caliber pistol kag mga magazine; isa ka rifle scope; kag mga bala sang .45 kag .40 caliber pistol sa ginpatigayon nga raid sang mga otoridad sa puluy-an ni Negros Oriental 3rd District Congressman Arnie Teves sa Purok 4, Brgy. Poblacion, Basay, Negros Oriental.
Ginraid sang mga otoridad ang lima ka mga balay ni Congressman Teves sa nagkalain-lain nga bahin sang Negros Oriental kaina sang kaagahon.
Suno sa mga otoridad, nagserbe sila sang search warrant para sa illegal possession of firearms.
Ang search warrant ang nagikan sa Mandaue City kag gin-aprubahan sang Marso 7, 2023.
Sa inisyal nga impormasyon, ang tawo lamang sa puluy-an amu ang caretaker, gwardiya kag abogado sini nga nagkooperar naman sa mga otoridad.
Madumduman nga sang Lunes, nagpagwa sang statement si Congressman Teves nga nagaapelar kay President Ferdinand “Bongbong” Marcos Jr. nga hambalan ang iya mga tinawo nga ibalik na ang iya nga mga lisensya sang iya mga armas para sa proteksyon sang iya nga pamilya.
Suno diri, isurrender niya ang mga armas nga nabilin sa Negros Oriental kun magbalik ini nagikan sa abroad kag iya nga igasurrender santo sa layi.// Suno kay Teves, partial lang ang nasurrender niya nga mga armas sang ginrevoke sang Firearms and Explosives Office ang mga lisensya sang mga armas.
